Фулам постигна договор со Реал Мадрид за ангажман на младите фудбалери Гонзало Гарсија и Цезар Паласиос во трансфер вреден вкупно 50 милиони евра.
Според договорот, англискиот премиерлигаш ќе плати 40 милиони евра за напаѓачот Гарсија, додека трансферот на Паласиос е проценет на 10 милиони евра. Реал Мадрид воедно обезбеди и клаузула според која ќе добие 30 проценти од евентуалната идна продажба на двајцата играчи.
Се очекува двајцата наскоро да му се приклучат на новиот тренер на Фулам, Алваро Арбелоа, кој добро ги познава од академијата на Реал Мадрид и бил еден од клучните фактори за нивното доаѓање во Лондон.
Извори блиски до преговорите тврдат дека реализацијата на трансферите е практично договорена. Важна улога во одлуката имала и желбата на Гарсија и Паласиос да настапуваат во Премиер лигата под водство на Арбелоа, со кого веќе успешно соработувале во младинските категории на „кралскиот клуб“.
Фулам ова лето беше принуден да бара нови решенија во нападот, откако клубот остана без двајца важни офанзивци. Најдобриот стрелец од минатата сезона, Хари Вилсон, како слободен играч се пресели во Лидс Јунајтед, додека Раул Хименез се врати во Вулверхемптон.
Гонзало Гарсија има 22 години и минатата сезона го привлече вниманието со настапите за првиот тим на Реал Мадрид. На 39 натпревари постигна осум голови, а особено се истакна со хет-трикот против Реал Бетис во јануари. Одлични партии прикажа и на Светското клупско првенство, каде со четири погодоци беше најдобар стрелец на турнирот.
Цезар Паласиос, кој е една година помлад, настапува како офанзивен играч за врска. Во изминатата сезона забележа седум настапи за сениорскиот тим на Реал Мадрид, од кои пет во Ла Лига, а дебито го имаше во јануари.
Двајцата треба да бидат првите големи засилувања на Фулам ова лето, заедно со шведскиот напаѓач Јона Куси-Асаре, чиј договор клубот го откупи од Баерн Минхен по успешната позајмица.