Иран соопшти дека во наредните денови нема да одржи никакви директни преговори со Соединетите Американски Држави, иако Вашингтон претходно најави средба на двете делегации во Доха.
Портпаролот на иранското Министерство за надворешни работи, Есмаил Багаеи, изјави дека техничката делегација на Иран ќе отпатува во Катар, но тоа нема никаква врска со американската делегација.
„Во наредните денови нема да имаме никакви преговарачки средби со американската страна, на ниту едно ниво“, изјави Багаеи.
Претходно, Белата куќа соопшти дека американскиот претседател Доналд Трамп го испратил својот зет Џаред Кушнер и специјалниот пратеник Стив Виткоф да ја предводат американската делегација во Доха.
Спротивставените информации доаѓаат само неколку дена по новата размена на ракетни напади, што дополнително ја доведе во прашање стабилноста на прекинот на огнот постигнат на 17 јуни.
Според договорот, САД и Иран си дадоа рок од најмалку 60 дена за спроведување на меморандум од 14 точки, кој предвидува продолжување на примирјето, разговори за иранската нуклеарна програма и преговори за траен мировен договор. Но, процесот се одвива бавно, а двете страни меѓусебно се обвинуваат за непочитување на договорените обврски.
По американските и израелските напади врз Иран на 28 февруари, пловидбата низ Ормутскиот Теснец беше речиси целосно прекината, што предизвика цената на нафтата да надмине 100 долари за барел и дополнително ги зголеми инфлаторните притисоци во светот.
Израел не учествува во американско-иранските мировни разговори и се дистанцираше од постигнатиот договор, додека тензиите во регионот ги отежнуваат и напорите за стабилизација на состојбата во Либан.
Сепак, агенцијата „Ројтерс“, повикувајќи се на висок ирански функционер, објави дека денеска во Доха би можела да се одржи средба посветена на безбедноста во Ормутскиот Теснец и намалување на тензиите. Друг извор наведува дека техничките тимови на САД и Иран в среда одделно ќе разговараат со посредници од Катар и Пакистан.