Бројот на потврдени случаи на хантавирус поврзан со крузерот MV Hondius се искачи на 13, со три смртни случаи, изјави во среда генералниот директор на Светската здравствена организација (СЗО), Тедрос Аданом Гебрејесус, додавајќи дека немало смртни случаи од 2 мај.
Тој рече дека Шпанија пријавила нов случај меѓу патниците во карантин, со што вкупниот број на инфекции се искачил на 13, објави Ројтерс.
Според него, три лица починале од вкупниот број случаи, но немало нови смртни случаи од 2 мај, а ситуацијата е оценета како стабилна.
Гебрејесус додаде дека заразените патници ја добиваат потребната медицинска нега, додека остануваат во карантин.
Во изминатите две недели, сите преостанати патници, членови на екипажот и медицински персонал го напуштија крузерот MV Hondius, кој беше епицентарот на епидемијата.
СЗО наведува дека хантавирусите се вируси што ги пренесуваат глодари и можат да предизвикаат сериозни болести кај луѓето, при што се проценува дека секоја година низ целиот свет се пријавуваат од 10.000 до 100.000 случаи, во зависност од сојот на вирусот.