Венко Филипче преку Рубин Земон е во директна соработка со Виктор Стојанов, кој е прогласен за персона нон грата во Македонија поради неговите антимакедонски ставови, обвини денеска портпаролот на ВМРО-ДПМНЕ, Валентин Манасиевски.
„Филипче е соработник со Виктор Стојанов, кој се залага за промоција на бугарскиот идентитет, историја и култура во Македонија. Неговите јавни настапи се насочени кон негирање на македонскиот јазик и националната посебност, промовирајќи ја тезата дека Македонците и Бугарите се еден ист народ“, рече Манасиевски.
Тој додаде дека Стојанов, поради, како што рече, „ксенофобичните односи“, бил означен како закана за националната безбедност и му е забранет влез во државата.
Од ВМРО-ДПМНЕ обвинија дека Филипче соработува со човек кој „ја негира Македонија, македонскиот идентитет, јазикот, културата и историјата“, како и дека е „директен соработник на Бугарија во Македонија“.
Манасиевски истакна и дека Филипче е „единствениот кој бара внесување на Бугарите во Уставот без гаранции дека тоа е последниот чекор за влез во Европската Унија“.
„Венко Филипче со ваквиот однос кон Македонија си ја запечатува својата политичка кариера“, порача Манасиевски.