ФБИ нуди награда од 200.000 долари за информации што ќе доведат до апсење на Моника Вит, поранешна разузнавачка специјалистка на воздухопловните сили на САД, која беше обвинета во 2019 година за шпионажа за Иран. Се верува дека Вит пребегнала во Иран во 2013 година.
– ФБИ не заборавило и веруваме дека во ова критично време во иранската историја, некој знае каде се наоѓа, рече Даниел Виерзбицки, специјален агент задолжен за контраразузнавање и сајбер безбедност во канцеларијата на ФБИ во Вашингтон, во можна референца за тековните тензии меѓу САД и Иран.
„ФБИ ве повикува да се јавите за да можеме да ја уапсиме Вит и да ја изведеме пред лицето на правдата“, се вели во соопштението.
Вит беше офицер за контраразузнавање во Канцеларијата за специјални истраги на воздухопловните сили. Од 2003 до 2008 година, нејзината работа вклучуваше контраразузнавачки задачи што ја однесоа на Блискиот Исток.
Тогашниот помошник-генерален обвинител Џон Демерс во 2019 година тврдеше дека Вит била специјално регрутирана од Иран. Откако пребегнала, таа наводно му открила на Иран постоење на „тајна програма за собирање разузнавачки информации“ и идентитетот на американски разузнавачки службеник, „со што го загрозила животот на повеќе личности“.
По нејзиното бегство, иранските владини претставници ѝ обезбедиле „стоки и услуги, вклучително и домување и компјутерска опрема“ за да ѝ ја олеснат работата, се вели во обвинението.