Претседателот на СДСМ, Венко Филипче, по повод годишнината од смртта на Гоце Делчев, упати остри критики кон ВМРО-ДПМНЕ и лидерот Христијан Мицкоски, обвинувајќи ги за злоупотреба на ликот и делото на македонскиот револуционер.
„Денес ја одбележуваме годишнината од смртта на Гоце Делчев, најголемиот македонски револуционер, човек кој се бореше за слобода, правда и рамноправност. За жал, неговото име денес се злоупотребува од страна на ВМРО – организација која се претставува како негов наследник, а всушност е криминална група предводена од Христијан Мицкоски“, изјави Филипче.
Тој направи споредба меѓу, како што рече, идеалите на Делчев и актуелните политики на опозицијата.
„Гоце Делчев се бореше против неправда и туѓинска власт, додека денешното ВМРО се бори за тендери, заштита на криминалци и бугарски пасоши. Наместо слободна и праведна Македонија, тие ја претворија државата во плен, а граѓаните во заложници на корупцијата“, посочи Филипче.
Според него, доколку Делчев беше жив денес, „би се срамел од оние што се повикуваат на неговото име“ и „лично би се борел против Мицкоски и криминалната ВМРО“.
Филипче нагласи дека СДСМ ја одбележува годишнината со почит кон идеалите на Делчев и порача дека „доаѓа време на правда и одговорност“.
„СДСМ продолжува со борбата заедно со граѓаните за враќање на власта во рацете на народот и за демократска и европска Македонија – праведна и слободна земја каква што ја сакаше Гоце Делчев“, додаде тој.