Јапонија ќе увезува сурова нафта произведена во Русија за прв пат по нападите на САД и Израел врз Иран во февруари, што доведоа до фактичко затворање на Ормутскиот теснец, изјави официјален претставник на јапонското Министерство за економија, трговија и индустрија.
Нафтата доаѓа од проектот Сахалин-2 на рускиот Далечен Исток, а пратката ја купи јапонската компанија „Таиџо Оил“. Танкерот со нафта исплови кон крајот на април и се очекува да пристигне во префектурата Ехиме во западна Јапонија, објави новинската агенција „Кјодо“.
Овој потег доаѓа во време кога Јапонија, која е во голема мера зависна од увозот на енергија од Блискиот Исток, се стреми да ги диверзифицира своите извори на снабдување поради нарушувањата на глобалните пазари.
Проектот Сахалин-2 го води рускиот енергетски гигант „Газпром“, а јапонската корпорација „Мицубиши“ и „Мицуи и Ко.“ се главни партнери.
Според јапонските власти, пратката не е предмет на санкции наметнати врз Русија од страна на САД и европските земји по избувнувањето на војната во Украина во 2022 година.