Избегната е сериозна несреќа на пешачката патека „Студенчишта“ во Охрид, кога параглајдерист кој вршеше комерцијални летови со туристи, за „влакно“ не повреди мајка и дете кои се движеа по патеката.
Според снимка од настанот, параглајдеристот лета опасно ниско над пешачката зона и во последен момент ја избегна мајката со детето, по што удри во столб за улично осветлување и го оштети. На видеото се слуша и вознемирениот крик на мајката, која успеа да се тргне непосредно пред потенцијалниот удар.
Граѓаните кои секојдневно ја користат патеката реагираат дека ваквите ситуации се сериозна закана за безбедноста и бараат од надлежните институции итно да го испитаат случајот. Се очекува институциите да утврдат дали биле почитувани правилата за летање и дали параглајдеристот поседувал соодветни дозволи за изведување на комерцијални летови.
