Американскиот претседател Доналд Трамп објави дека американската војска спроведе „една од најсмелите операции за пребарување и спасување во историјата“ и го извлече вториот член на екипажот на соборениот борбен авион Ф-15 од Иран.
„Го имаме! Овој храбар офицер, високо почитуван полковник, сега е безбеден“, рече Трамп на социјалната мрежа Truth Social, додавајќи дека пилотот бил длабоко зад непријателските линии, во планините на Иран, додека непријателските сили го барале.
Трамп тврди дека операцијата е спроведена по негова наредба со вклучување на десетици авиони вооружени со „најмоќното оружје во светот“ и дека пилотот е повреден, но не е во животна опасност.
Според него, ова е втора успешна операција за спасување за два дена. Првиот пилот од истиот соборен авион беше спасен порано, но ова не беше објавено за да не се загрози втората операција.
– За прв пат во воената историја, двајца американски пилоти се спасени одделно, длабоко на непријателска територија, напиша Трамп.
Тој додаде дека „ниту еден американски војник не е убиен“ во ниту една од операциите, што според него е доказ за „целосна воздушна супериорност на САД над Иран“.
Американски авион Ф-15Е Страјк Игл беше соборен над јужен Иран во петокот, при што загинаа двајца членови на екипажот – пилот и офицер за оружје. Несреќата предизвика сложена операција за пребарување и спасување во исклучително опасни услови.