Градоначалникот на Њујорк, Зохран Мамдани, повтори дека ќе се спротивстави на федералните мерки против имигрантите, посебно нагласувајќи дека никој во неговата администрација, вклучително и Полициската управа на Њујорк (NYPD), нема да соработува со агентите на Службата за имиграција и царина (ICE).
Оваа остра реакција доаѓа по инцидентот што се случи во Минеаполис, кога агент на ICE застрела и уби жена.
Мамдани не штедеше зборови кога го опишуваше настанот во Минеаполис, нарекувајќи го „ужасен“ и директно обвинувајќи ја администрацијата на претседателот Доналд Трамп.
„Веста што доаѓа од Минеаполис е ужасна. Ова е дел од она што беше година полна со суровост. Знаеме дека кога агентите на ICE ги таргетираат имигрантите, тие таргетираат секој од нас низ целата земја“, рече Мамдани.
Градоначалникот отиде чекор понатаму, опишувајќи го пукањето како „убиство“ и продолжение на бруталното угнетување на имигрантските заедници во Соединетите Држави.
„Им ставив до знаење на сите во градската власт, а тоа ја вклучува и њујоршката полиција, дека ќе се придржуваме до нашите политики за „град-засолниште“. Нема да им помагаме на агентите на ICE во нивната работа“, додаде Мамдани, потврдувајќи дека Њујорк останува град кој „ќе се залага за имигрантите во сите пет општини“.
Министерката за внатрешна безбедност Кристи Ноем остро реагираше на прес-конференција, пофалувајќи ги тековните операции на ICE во Њујорк и осудувајќи ги политиките на градовите-засолниште за кои таа вели дека „ги штитат криминалците“.
„Како дел од операцијата „Салво“, уапсивме 54 лица за само неколку месеци“, рече Ноем.
„Уапсените се насилни членови на транснационални банди и соработници поврзани со групата Тринитариос, одговорна за трговија со оружје, шверц со луѓе, дистрибуција на наркотици и вооружени грабежи“, рече таа.
Новиот судир околу спроведувањето на имиграциските закони доаѓа само неколку недели откако Мамдани се сретна со претседателот Доналд Трамп во Овалната соба, и покрај тоа што претходно се залагаше за политики за заштита на Њујорк од одлуките на Трамп.
Аналитичарите истакнуваат дека Мамдани е во деликатна ситуација.
Од една страна, тој се обидува да ги заштити имигрантите, а од друга страна, се обидува да го спречи Трамп да ја испрати Националната гарда во Њујорк или да го зголеми бројот на агенти на ICE, потези што американскиот претседател веќе ги направи во други градови предводени од демократите.