Резиденцијата на американскиот потпретседател Џ.Д. Венс во Синсинати беше вандализирана, наводно неколку часа откако Венс ја напуштил куќата. Полицијата уапси маж, чиј идентитет не е објавен, а сега се појавија нови детали за нападот.
Иако се сомневаше дека некој можеби пукал во домот на американскиот потпретседател, се покажа дека прозорците биле скршени од блиску, а мажот подоцна бил уапсен.
Портпаролот на Тајната служба, Ентони Гуглиелми, потврди дека осомничениот бил приведен од агенти на Тајната служба и подоцна предаден на локалната полиција поради сомнение за оштетување на имотот.
„Домот бил празен во времето на инцидентот, а потпретседателот и неговото семејство не биле во Охајо“, рече Гуглиелми.
Асошиејтед Прес, повикувајќи се на двајца службеници за спроведување на законот, објави дека агентите на Тајната служба слушнале гласен шум во близина на домот околу полноќ и го пронашле осомничениот како со чекан скршил прозорец и се обидувал да влезе во зградата.
Според еден од службениците, човекот, исто така, вандализирал возило на Тајната служба во дворот додека се приближувал кон домот. Како успеал да го уништи возилото, а потоа да се приближи и да ги оштети прозорците на домот, кој е под 24-часовно обезбедување, во моментов е нејасно.
WLWT објави дека Венс ја поминал претходната недела во Синсинати пред да се врати во Вашингтон во недела попладне.
Гуглиелми додаде дека локалното обвинителство на САД разгледува можни обвиненија против осомничениот.
Патем, Џ.Д. Венс купил куќа во елитната населба Волнат Хилс во Синсинати во 2018 година за 1,4 милиони долари.