Во кражба во филијала на банката Шпаркасе во германскиот град Гелзенкирхен, крадци украле повеќе од 30 милиони евра, според првичните проценки, соопшти полицијата.
Истражителите велат дека ова е груба проценка по вчерашниот грабеж врз основа на осигурената вредност на сефовите, бидејќи банките немаат увид во тоа колку пари, злато и вредни предмети клиентите чуваат во своите сефови.
Секој од повеќе од 3.000 сефови е осигуран за 10.300 евра, а полицијата не ја исклучува можноста вкупната штета да е уште поголема, објавува германскиот портал WDR.
Крадците наводно влегле во банката преку подземна гаража и користеле специјална дупчалка за да пробијат дебел армиран бетонски ѕид до трезорот, каде што ограбиле околу 95 проценти од вкупно 3.250 сефови.
Полицијата бара црн Audi RS6 со хановерски регистарски таблички, за кој било пријавено дека е украден.
Сведоци пријавиле дека виделе неколку маскирани мажи како носат големи торби во гаражата на банката во ноќта помеѓу саботата и неделата.
Поради големиот број вознемирени клиенти кои се собраа пред филијалата, полицијата мораше да интервенира и да го обезбеди објектот во неколку наврати.
Банката постави посебна телефонска линија за клиентите и соопшти дека е многу веројатно дека нивните сефови се провалени.
Истрагата за точното време на провалата и идентитетот на сторителите е во тек.
Се верува дека инцидентот се случил или за време на божиќните празници или минатиот викенд. Според полицијата, зошто системот за противпожарен аларм бил активиран во понеделник наутро, останува нејасно.