Трагедија го потресе италијанскиот град Кампобасо, каде што 15-годишно девојче и нејзината мајка починаа во рок од неколку часа една по друга, додека таткото беше хоспитализиран.
Сомнежите се на труење со храна по вечерата на Бадник, а обвинителството започна истрага за да се утврди точната причина за смртта, пишува „Кориере дела Сера“.
Петнаесетгодишната Сара Ди Вита почина во саботата навечер во болницата Кардарели во Кампобасо. Само неколку часа подоцна, во недела наутро, нејзината 50-годишна мајка Антонела Ди Јелси почина во истата болница.
Нејзиниот сопруг и татко на девојчето, Џани Ди Вита (55), исто така беше задржан на лекување поради тешки симптоми.
Семејството, кое живее во градот Пјетракатела, се чувствувало лошо со денови, и наводно двапати биле вратени дома со брза помош бидејќи ситуацијата не изгледала сериозна.
Сепак, во саботата попладне, нивната состојба драстично се влоши. Поради неподносливи болки, тие повторно побараа медицинска помош.
Сара и нејзиниот татко беа итно примени на одделението за интензивна нега, додека мајката беше сместена на одделението за интерна медицина. За жал, за младата ученичка од Класичното средно училиште беше предоцна и таа почина околу 22:30 часот. Единствениот член на семејството кој немаше никакви симптоми е 20-годишната ќерка.
Според првите информации, се сомнева дека причина за трагедијата била вечера за Бадник составена од риба, морски плодови и школки. Истражителите се збунети од фактот дека на вечерата имало и други гости кои не чувствувале никаква непријатност.
Обвинителството во Кампобас нареди обдукција на телата на мајката и ќерката за да се разјасни дали смртта е предизвикана од труење, тешка алергиска реакција или нешто друго.
Случајот го истражува Мобилната полициска единица.