Основниот суд во Битола не го прифати предлогот на ОЈО Битола за определување мерка притвор за двајцата осомничени и наместо тоа определи мерка куќен притвор.
„Надлежниот јавен обвинител не се согласува со ваквата одлука, особено имајќи ги предвид ризиците од бегство на осомничените, од кои едниот има и значителен имот во друга држава. Од тие причини обвинителството ќе вложи жалба на одлуката на Судот и ќе бара мерка ефективен притвор“, извести ОЈО.
Имено денеска Финансиската полиција го уапси Борче Марковски, сопственик на компанијата „Марковски Компани ДООЕЛ“ од Битола и почесен конзул на Белорусија во Македонија.
Во рамки на акцијата, приведени се и неколку поранешни директори од енергетскиот комбинат РЕК Битола.
Според првичните информации, Марковски и неговата компанија се поврзуваат со сомнителни договори со РЕК Битола, најголемиот енергетски капацитет во државата. „Марковски Компани“ во изминатите години добила повеќе тендери од овој комбинат, вредни неколку милиони евра.