Судијата на Апелациониот суд во Тирана – Астрит Каљаја, беше убиена денес во пукотница што се случи во судската зграда, а според досегашните информации, пукотницата се случила за време на судење поврзано со имотен спор меѓу извесен Ѓон Шкамби и неколку семејства од Скадар.
Осомничениот за убиството, идентификуван како Ѓон Шкамби е уапсен, соопшти албанската полиција.
Тој тврди дека е законски сопственик на зградата каде што живеат 31 семејство, додека тие семејства тврдат дека тој фалсификувал документи и се обидува насилно да им го одземе имотот.
Спорот е предмет на судска постапка со години, а денешното судење наводно било поврзано со тој случај.
Три други лица беа ранети во пукотницата и моментално се наоѓаат во болница.