Данска ги забрани сите цивилни летови со беспилотни летала до 3 октомври пред самитот на Европската унија во Копенхаген, објави данскиот министер за транспорт.
Министерството соопшти дека одлуката е донесена за да се „олесни безбедносната работа“ на полицијата, објаснувајќи дека не можат да дозволат „странски беспилотни летала да создаваат несигурност и одвлекување на вниманието“.
Данска, како и неколку други европски земји, пријави неколку „инциденти со беспилотни летала“ во последните недели. Само еден ден пред забраната, беспилотни летала беа видени над данските воени објекти.
Првите неидентификувани беспилотни летала беа забележани на 22 септември, кога аеродромите во Копенхаген и Осло беа накратко затворени поради тоа. Минатата недела, летовите беа привремено суспендирани во Алборг и Билунд поради истите закани.
Истрагата на данските власти сè уште не утврди кој стои зад летовите. Министерот за одбрана ги нарече настаните „хибриден напад“ и дел од „систематска операција“. Премиерката Мете Фредериксен потврди дека е во тек истрага и не ја исклучи можноста дека Русија стои зад инцидентот.
Москва ги отфрли ваквите обвинувања, велејќи дека „силно отфрла“ каква било вмешаност.
Во меѓувреме, министрите за одбрана од десет земји-членки на ЕУ се согласија да создадат таканаречен „ѕид од беспилотни летала“ како одговор на честите инциденти. НАТО објави дека го зголемил нивото на тревога во Балтикот.
Данското Министерство за транспорт соопшти дека полициските сили се „во значително поголема тревога“ пред самитот на ЕУ и дека приоритет е „да се заштитат Данците и нашите гости“. Прекршувањето на забраната може да резултира со парична казна или затворска казна до две години.
Данска моментално претседава со Советот на ЕУ.
Покрај Данска, Норвешка и Романија, исто така, пријавија слични инциденти во текот на викендот. Норвешкиот оператор на аеродроми „Авинор“ пријави „активност на беспилотни летала“ над аеродромот Бронојсунд, а истрага е во тек по наводните видувања во близина на најголемата воена база во земјата.
Во Романија, пилотите на „Туркиш ерлајнс“ пријавија беспилотно летало во воздушниот простор над Букурешт во неделата, што предизвика пренасочување на летовите. Земјата донесе закон претходно овој месец со кој се овластуваат воените пилоти да соборуваат неидентификувани авиони и беспилотни летала.
Тензиите растат и во Источна Европа: минатата недела, Естонија и Полска побараа консултации со сојузниците на НАТО откако околу 20 руски беспилотни летала влегоа во полскиот воздушен простор, а руски ловци МиГ-31 влегоа во естонскиот воздушен простор.