Високата претставничка на ЕУ за надворешни работи и безбедносна политика, Каја Калас, остро го критикуваше својот претходник Жозеп Борел, тврдејќи дека таа направила повеќе за да го омекне однесувањето на Израел во конфликтот во Газа отколку што тој некогаш направил.
„Постигнав повеќе со Израел отколку што мојот претходник некогаш постигнал. Борел не направи апсолутно ништо“, рече Калас, според „Ел Паис“.
Иако Борел е познат по своите остри критики кон Израел и неговите постапки за време на војната со Хамас, Калас верува дека поострата реторика не помага бидејќи тогаш Израел престанува да комуницира со ЕУ.
„Дали ќе ги натераме да престанат со убивањето ако користиме поостар јазик и предложиме предлози што земјите-членки нема да ги одобрат? Чувствуваме одредена фрустрација што не отидовме понатаму, но едноставно немаше консензус за тоа и тоа би го намалило нашиот кредибилитет“, нагласи шефицата на европската дипломатија.
Според неа, Израел мора да биде под притисок, но „секогаш со договори и консензус“.
„Јас ги претставувам земјите што се строги кон израелскиот премиер Бенјамин Нетанјаху, но и оние што имаат поинаков пристап“.
Откако ја напушти функцијата висок претставник на ЕУ за надворешни работи на крајот на ноември минатата година, Борел ги засили критиките.
Во мај оваа година, тој рече дека ретко слушнал шеф на држава толку јасно да изложи план „кој одговара на законската дефиниција за геноцид“.
Минатата недела, потпретседателката на Европската комисија, Тереза Рибера, исто така, ги опиша воените акции на Израел во Газа како геноцид.