61-годишен маж загина откако група луѓе беше погодени од гром на стрелиште во американската држава Њу Џерси, потврди локалната полиција. Несреќата се случи синоќа на стрелиштето „Блек Најт Боубендерс“ во општина Џексон, околу 30 милји источно од Трентон, главниот град на државата.
Според полициското соопштение, повредени се вкупно 13 лица.
– Повредите се движат од изгореници до симптоми како што се гадење и слабост, рече началникот на полицијата Метју Д. Кунц.
Претседателот на стреличарскиот клуб Џери Миндурски рече дека најмалку четири деца биле однесени во болница со изгореници, како и тројца возрасни инструктори. Тој потврди дека починатиот маж бил член на клубот, но не знаел во каква состојба се повредените ниту во кои болници биле однесени.
Според официјалните информации, службите за итни случаи биле повикани во 19.13 часот по локално време.
Миндурски рече дека се моли за семејството на починатиот и за сите повредени.
„Сè се случи толку ненадејно“, рече тој.
Гувернерот на Њу Џерси, Фил Марфи, објави на платформата X дека е свесен за ситуацијата и ја повика јавноста да се моли за сите погодени од оваа трагедија. Вчера беа прогнозирани грмотевици низ источните и централните делови на Соединетите Американски Држави, вклучувајќи ја и областа на општина Џексон.