Новиот сет на тарифи на Трамп стапи на сила утрово за приближно 60 земји ширум светот. Кина сега се соочува со вкупна царина од 104 отсто за увоз. За Виетнам беше воведена царина од 46 отсто, за Тајланд 36 отсто, за Јапонија 24 отсто и за Европската унија 20 отсто.
И додека кинеската влада допрва треба официјално да го коментира наметнувањето на рекордни тарифи од 104 отсто за кинескиот извоз во САД, првите знаци на одговор доаѓаат од државните медиуми.
На социјалната мрежа Веибо беше објавен коментар на профилот на Ју Јуан Тан Тиан, кој е поврзан со државната телевизија CCTV, точно во 12:01 часот по локално време, во моментот кога стапија на сила тарифите.
„Не бараме неволја, но не се плашиме од тоа“, се вели во објавата. Се додава дека „кинескиот народ не сака притисок или закани“.
Пораката го повторува претходниот став дека Кина „ќе ја води борбата до крај“, но и дека „не ја затвори вратата за дијалог“.
„Кина нема да покаже слабост и нема да се согласи на компромиси. На целиот свет ќе му ја покажеме нашата решеност да го заштитиме мултилатералниот трговски систем. се вели во соопштението.
Вкупната трговија со стоки меѓу САД и Кина минатата година изнесуваше околу 585 милијарди долари.
Меѓутоа, САД увезле значително повеќе стоки од Кина, околу 440 милијарди долари, отколку што извезувале, бидејќи кинескиот увоз од Америка изнесувал околу 145 милијарди долари.
Во 2024 година, најголемата категорија на кинески извоз во САД беа електронски производи како што се паметни телефони, лаптопи и телекомуникациска опрема, како и играчки. Беа извезени и голем број батерии, кои се клучни за електричните возила.
Од друга страна, најголемиот американски извоз на кинескиот пазар беше сојата, која првенствено се користи за хранење на околу 440 милиони свињи во Кина.
САД исто така извезуваа авиони, мотори, фармацевтски производи и нафта.