Откако парламентот ќе го ратификува договорот меѓу Република Македонија и Република Косово за отворање на граничниот премин Белановце-Станчич, останува да се изгради потребната патна инфраструктура за да се стави во функција овој премин.
Ова за весникот „Коха“ го потврдил заменик министерот за транспорт и врски, Џељиљ Бајрами.
– Потребните финансиски средства се обезбедни од европски фондови и многу набрзо ќе почнат работите.Експропријацијата е извршена, избрана е компанијата. Остануваат само уште некои технички прашања, кои исто така многу брзо ќе бидат заокружени. Верувам дека преминот во функција ќе биде ставен за една година, тврди Бајрами.
Друг значаен проект со Косово, кој чека на реализиација повеќе од седум години е реконструкција и проширување на патнот правец Скопје-Блаце, вклучувајќи го и проширувањето на преминот Блаце. Овој проект, се согласува и Бајрами, останал заложник на немањето финансиски средства.
– За овој проект во разговори сме за изноѓање финансиски извори. Доколку не можеме да обезбедиме кредит од некоја меѓународна финансиска инситуција, тогаш ќе настојуваме овој проект да се реализира со буџетски средства, изјавил Бајрами.
Според него, за изградба на автопатот од Приштина до Блаце на косовската страна, доколку почне со изградба на крајот од годинава, потребни и се најмалку три години за негово завршување. Тој е убеден дека до тогаш ќе бидат завршени работите и на делницата Скопје-Блаце.
