Властите во Калифорнија издадоа предупредување за невреме кое се заканува да донесе обилни врнежи, силен ветер и поплави во областите кои неодамна беа погодени од шумски пожари.
Поради тоа, на граѓаните им беа поделени вреќи со песок, распоредени се чамци за спасување, а на граѓаните им беше препорачано да подготват вреќи со најпотребните предмети, пренесува АП.
Во меѓувреме, градот Портланд им нареди на комуналните претпријатија да ги премачкаат улиците со 2.000 галони течен агенс за одмрзнување, додека официјалните лица во Орегон и Ајдахо отворија засолништа за итни случаи.
Во Јужна Калифорнија се предвидуваа околу 15 сантиметри дожд во планините и околу 7,6 сантиметри во крајбрежните области и долините.
Хидрологот на Националната метеоролошка служба Брент Бауер вели дека силните ветрови можат да соборат дрвја, да предизвикаат прекини на електричната енергија и да ги одложат летовите.
Издадено е предупредување за евакуација во кањонот Мандевил и другите области уништени од пожарот во Палисад, најразорниот пожар во историјата на Лос Анџелес.
Училиштата во Малибу денеска ќе бидат затворени.
Дождот уследи по бурите кои донесоа обилни снежни врнежи и дожд во источниот дел на Соединетите држави од Кентаки до Вашингтон, предизвикувајќи стотици сообраќајни несреќи, прекин на електричната енергија и зголемен ризик од поплави.
Околу 7.000 летови беа откажани или одложени низ САД во средата, вклучувајќи ги и летовите од аеродромите во Вашингтон.
Во Вирџинија, каде е прогласена вонредна состојба, полицијата во вторникот и средата пријавила околу 850 несреќи, во кои се повредени десетици луѓе, во Мериленд биле пријавени 235 несреќи, а во јужниот дел на Западна Вирџинија главните патишта биле привремено затворени поради сообраќајни несреќи.