Полскиот премиер Доналд Туск денеска изјави дека победата на републиканецот Доналд Трамп на претседателските избори во Америка ќе има сериозни последици за европската безбедност, но дека засега не се знае какви ќе бидат тие.
„Изборите во Америка ќе имаат сериозни последици за европската политика, особено во областа на безбедноста“, рече тој на прес-конференција пред неговиот лет за Будимпешта на Самитот на европската политичка заедница.
Тој посочи дека тоа е многу важно за Полска бидејќи, како што рече, таа земја има јасно дефинирани интереси, пренесува Би-Би-Си.
Полскиот премиер рече дека неговата главна порака до другите европски лидери е да се „консолидираат трансатлантските односи“, додавајќи дека имал „добри лични односи“ со Трамп за време на неговиот прв мандат.
Туск го опиша Трамп како партнер кој е „непредвидлив“ во политиката, и кон своите сојузници и кон непријателите.
„Мораме да бидеме подготвени за промена во однос на претседателствувањето на Џо Бајден“, рече Туск.