Тепачка во дворот на средното училиште „Нико Нестор“, за време на спроведување на проектот „Стоп на насилството“ во Струга“. Во инцидентот учествувале две групи деца сите од албанска националност кои живееле во Струга, но и во околните струшки села.
На тепачката и претходела караница, која најверојатно се разгорила поради претходна нетрпеливост помеѓу двете групи. Полицијата веднаш интервенирала и ги разделила разбеснетите ученици со што спречила омасовување на тепачката.
Инцидентот го потврди и портпаролот на СВР Охрид, Стефан Димовски. Тој информира дека инцидентот се случил во 13.00 часот и дека во него учествувале 12 ученици сите од албанска националност. Портпаролот додава дека на информативен разговор во полициската станица во Струга бил повикан еден ученик, за кој се смета дека е организатор на тепачката.
Со име и презиме се знаат сите деца учесници во инцидентот и утре заедно со своите родители ќе бидат повикани на информативен разговор по полициската станица во Струга, вели портпаролот Димовски.
Тој додава дека повредени во инцидентот нема.
Тепачката во Нико Нестор се случила за време на средношколскиот хепенинг „Безбедни училишта“ што денеска под мотото „Стоп на насилството“ се спроведе и во Струга. Целта на проектот кој го спроведува МВР е превенирање на насилството меѓу младите.
Мики Трајковски