Меморандум за соработка за подобрување на меѓукултурното разбирање, денеска во Гостивар потпишаа градоначалниците на шест мултиетники општини во западниот регион на Македонија.
Проектот, кој во наредните две години ќе го спроведува невладината АДИ, со поддршка од амбасадата на Велика Британија во Македонија, вклучува истражување на меѓукултурната политика, подготовка на локална стратегија за меѓукултурна соработка и одржување локални настани, работилници и изложби.
За време на свеченоста Британскиот амбасадор, Кристофер Ивон ги посочи придобивките што ги создава неговата земја преку воспоставената соработка со државите во Европа.
Според Алберт Муслиу, извршниот директор на АДИ, спроведувањето на проектот дополнително ќе ја унапреди веќе воспоставената соработка меѓу шесте општини.
„Сигурен сум дека ваквата практика на креирање на локални стратегии за меѓукултурна и меѓуетничка соработка и нивна имплементација на долг рок ќе придонесе за засилен дијалог, толеранција и соработка меѓу различните етнички и религиозни заедници. Почитувањето на овие принципи е, всушност, и клучот за успехот на Македонија во евроинтегративните процеси“, додаде Муслиу.
Проектот ќе се спроведува во општините Тетово, Гостивар, Кичево, Брвеница, Јегуновце и Врапчиште.
Г.М.