Иранскиот претседател Ебрахим Раиси денеска оцени дека Исламската револуционерна гарда (ИРГЦ) му „одржала лекција“ на најголемиот непријател на земјата, Израел. „Казната на агресорите, која беше искрено ветување на моќниот и мудар лидер на Исламската револуција, се оствари“, рече Раиси во соопштението од претседателскиот кабинет.
Раиси ги предупреди сојузниците на Израел да не планираат контранапади: „Ги советуваме поддржувачите на окупацискиот режим да ја ценат оваа одговорна и пропорционална акција на Исламската Република Иран“. Тој предупреди дека реакцијата на неговата земја ќе биде „посилна“ во случај на „непромислено однесување“ од страна на Израел.
„Доколку ционистичкиот режим или неговите поддржувачи“ покажат „непромислено однесување, ќе добијат порешителен и многу посилен одговор“, рече тој.
Иранското Министерство за надворешни работи ги повика денеска амбасадорите на Обединетото Кралство, Франција и Германија за да го преиспита, како што го нарече нивниот „неодговорен однос“ во врска со одмаздничките напади на Техеран врз Израел, објави иранската полуофицијална Работничка новинска агенција.
Трите европски земји го осудија иранскиот беспилотен и ракетен напад врз Израел, кој траеше во текот на ноќта од саботата кон неделата и беше одмазда за израелското бомбардирање на нивниот конзулат во Сирија на 1 април.
Директорот за Западна Европа во иранското Министерство за надворешни работи ги обвини трите земји за „двојни стандарди“ затоа што се спротивставија на рускиот нацрт на изјавата на Советот за безбедност на ОН претходно овој месец, со која се осудува нападот на Израел врз комплексот на иранската амбасада во Сирија.
„Воената акција на Иран против базите на ционистичкиот режим (Израел) е во рамките на правото на самоодбрана според член 51 од Повелбата на Обединетите нации и е одговор на низа злосторства, вклучително и неодамнешниот напад врз конзуларниот комплекс во Сирија“, додаде официјалниот претставник.
Г7, која ги вклучува Франција, Германија и Обединетото Кралство, се очекува да одржи видео повик подоцна денеска за да разговара за неодамнешниот напад на Иран.