Тројца тинејџери се приведени во Германија под сомнение дека планирале напад мотивиран од исламистички екстремизам, соопшти денеска германското обвинителство.
Обвинителите соопштија дека се приведени две девојчиња на возраст од 15 и 16 години и едно 15-годишно момче од западната германска покраина Северна Рајна-Вестфалија.
Налозите за апсење на тинејџерите се издадени за време на велигденскиот викенд, соопштија официјални лица.
Приведените тинејџери ја величеле терористичката група Исламска држава (ИД) и дека нивниот план вклучувал напади со нож и молотови коктели врз верниците во црквите и полицијата во полициските станици.
Официјални лица рекоа дека тинејџерите формирале група за разговор и дека истражителите веруваат дека постои ризик од напад и затоа извршиле претреси, иако немало конкретен план за напад во одредено време или место.
Германија во моментов е во состојба на готовност за можни исламистички напади поради војната меѓу Израел и Хамас.
Исламистичките екстремисти извршија неколку напади во Германија во последниве години, а најсмртоносниот беше во Берлин во декември 2016 година, кога загинаа 12 лица.