Коалицијата „Вреди“ ќе има свои кандидати за пратеници и во изборните единици 3 и 4, најавија од уште една од партиите кои ќе учествуваат со заеднички листи на парламентарните избори. Рокот за кога политичките партии и коалициите треба да ги достават листите за пратеници до Државната изборна комисија (ДИК) за изборите закажани на 8 мај е денес до полноќ.
Откако вчера Арбен Таравари од Алијанса за Албанците (АА) во Тетово, најави, денес и од Движење Беса со потврда дека ќе имаат како коалиција кандидати за пратеници за изборните единици 3 и 4.
И од двете партии нема соопштено ниту едно име, ниту за носители на кандидатските листи и другите кандидати.
-Во ИЕ3 и ИЕ4 ќе имаме кандидати. Имаме повеќе имиња. Ни треба повеќе време да се консултираме. Не се партиски имиња, туку независни имиња. Затоа зедов автортизирање од централното собрание за да можеме да ги изберем личностите кои што ќе имаат влијание во тој регион, изјави вчера Таравари.
Како носители на листи коалицијата „Вреди“ ги одреди Изет Меџити во „единицата“, Африм Гаши во ИЕ2, Биљал Касами во ИЕ6 и Салим Сулејмани во „петката“. Коалицијата ја направија Движење Беса, Алтернатива, Алијанса за Албанците на Арбен Таравари и Демократско Движење на Африм Гаши.