Израелскиот претседател Исак Херцог рече дека Израел не може да остави вакуум во Газа и дека ќе мора да задржи големи сили таму за да го спречи повторното појавување на Хамас во палестинската енклава, објави Financial Times. „Ако се повлечеме, тогаш кој ќе преземе? Не можеме да оставиме вакуум. Мораме да размислиме каков ќе биде механизмот; има многу идеи“, рече Херцог во интервју за ФТ.
„Но, никој нема да сака повторно да го претвори ова место, Газа, во терористичка база“, додаде тој.
Минатата недела израелскиот премиер Бенјамин Нетанјаху изјави за ABC News дека Израел „на неодредено време“ ќе има одговорност за безбедноста на енклавата по војната, но САД возвратија на тоа, велејќи дека Палестинците треба да управуваат со Газа откако Израел ќе ја заврши војната против Хамас.
Херцог изјави за ФТ дека израелската влада разговара за многу идеи како да управува со Газа по завршувањето на војната меѓу Израел и Хамас, додавајќи дека претпоставува дека САД и „соседите во регионот“ ќе бидат вклучени во повоен аранжман.
Американскиот претседател Џо Бајден рече дека јасно му ставил до знаење на израелскиот премиер Бенјамин Нетанјаху дека решението со две држави е единствениот одговор на израелско-палестинскиот конфликт и дека окупацијата на Газа би била „голема грешка“.