Иран предупреди дека може да се очекува „превентивна акција“ во наредните часови и дека Израел ќе се соочи со последици за секоја акција што ќе ја преземе во Газа, објави државната телевизија. „Сите опции се отворени за фронтот на отпорот против воените злосторства на Израел“, рече министерот за надворешни работи Хосеин Амирабдолахиан.
„Фронтот на отпорот е способен да води долготрајна војна со непријателот. Во наредните часови можеме да очекуваме превентивна акција на фронтот на отпорот“, рече тој. „Водачите на отпорот нема да дозволат ционистичкиот режим да преземе каква било акција во Газа. Сите опции се отворени и не можеме да бидеме рамнодушни кон воените злосторства извршени врз народот во Газа“, рече тој.
Иранскиот министер за надворешни работи не објасни што мисли под фронтот на отпорот, но терминот Оска на отпорот може да се однесува на лабав сојуз меѓу Иран, палестинските милитантни групи, Сирија, либанската милитантна група Хезболах и други фракции. Иран финансира групи како Хамас и Хезболах во регионот.
Иранскиот врховен лидер, ајатолахот Али Хамнеи, претходно изјави дека не е вклучен во нападите на Хамас врз Израел, но го поздрави, како што го нарече, „непоправливиот“ воен и разузнавачки пораз на Израел.