Се отвора ли повторно Пандорината кутија со евенталното почнување постапка за измени на Уставот, предложени од ВМРО-ДПМНЕ.
Владејачката ВМРО-ДПМНЕ предлага, бракот во највисокиот правен акт на државата, Уставот да биде дефиниран како заедница единствено меѓу маж и жена, а децата без родители да можат да бидат посвојувани само од брачни двојки во кои ќе има еден маж и една жена или од самохрани родители.
Утре иницијативата е пред Комисијата за уставни прашања, со која претседава спикерот Трајко Вељаноски.
За изгласување на измени во Уставот, потребно е двотретинско мнозинство или 82 позитивни гласа.
СДСМ смета дека за ова треба посеопфатна јавна и стручна дебата и јасни ставови од невладините организации и науката. Устав, велат не може да се менува по скратена постапка.
За дел од граѓанскиот сектор, владејачката партија со ова провоцира политики на дискриминација и на нетолеранција.
ДУИ и ДПА, повторно тактизираат, но својата поддршка за какви било измени на Уставот редовно ја условуваат со измени на Уставот, кои се однесуваат на правата на Албанците.
ВМРО-ДПМНЕ и покрај нерасчистената математика со гласовите, не се откажува од иницијативата.
Тука се и либералите со своето барање за измени во Уставот со кои претседателот на Македонија ќе се избира со бадентер во Собранието.
Иницијативите за измени на Уставот секогаш отвораат нови прашања и апетити за партиски или национални теми за кои сметаат дека носат политички поени.