Косовската полиција денеска извести дека тројца нивни граничари биле киднапирани од српските сили за време на патрола во градот Тресава – Баре, на граничната линија на северот на Косово.
Косовскиот премиер Албин Курти кажа дека тројца полицајци биле „киднапирани“ од српската војска и оцени дека тоа е „одмазда“ за апсењето на Милун Миленковиќ во вторникот.
„Тројца косовски полицајци се киднапирани денеска во Лепосавиќ каде некогаш имало илегален шверцерски пат кој се наоѓа на околу 300 метри во нашата државна територија.
Се сомневаме дека се киднапирани од српската војска, јасно како одмазда на Србија за вчерашното апсење на озлогласениот криминалец Милун Миленковиќ, кој е еден од водачите на организираниот криминал и шверцот“, напиша Курти на својот фб профил.
„Влегувањето на српските сили на територијата на Косово е агресија и цел на ескалација и дестабилизација. Бараме итно ослободување на тројцата киднапирани полициски службеници и ги повикуваме меѓународните фактори да го осудат овој чин на српска агресија“, додаде Курти на својот Фејсбук профил.