Украински агенти подготвувале атентат врз шефот на дипломатијата Бујар Османи, за време на неговата посета на градот Тираспол во февруари, како претседавач на ОБСЕ тврди портпаролката на руското Министерство за надворешни работи Марија Захарова.
„На 14 февруари се подготвувал терористички напад пат против претседавачот на ОБСЕ, министерот за надворешни работи на Северна Македонија Бујар Османи и шефот на мисијата на ОБСЕ во Молдавија, американската државјанка Кели Кејдер-Линг“, пишува Захарова на Телеграм.
Информациите за наводниот атентат, Русија наводно ги добила од уапсениот Вјачеслав Кисничан, за кого Русите тврдат дека е украински агент. Тој наводно атентатот го подготвувал во својата гаража.
„Во последен момент, Кисничан сфатил дека не може да ја разнесе поворката на ОБСЕ без да се повреди и се откажал од првичниот план. Сето тоа го признал на распит“, тврди Захарова.
Ваквите информации уште во март ги објави молдавскиот медиум „Реалитатеа“, според кој бил испланиран напад врз Мисијата на ОБСЕ во Бендер, а експлозијата требало да се случи пред еден месец, на 14 февруари, кога претседавачот на ОБСЕ Османи бил во посета на овој регион.