Силите од источна Либија денеска соопштија дека пронашле 10 буриња со ураниум кои Меѓународната агенција за атомска енергија (МААЕ) ги прогласи за исчезнати недалеку од складиштето во јужна Либија од каде што се земени. Калед Махџуб, претставник за медиуми на Либиската национална армија (ЛНА), главната источна воена група, рече дека се пронајдени 10 исчезнати буриња, иако на видеото што тој го испрати се гледаат работниците како бројат 18 буриња.
МААЕ во доверливиот извештај до земјите-членки, што го видел Ројтерс, соопшти дека за време на инспекцијата на неименувана локација во Либија во вторникот, открила дека ураниумот исчезнал. Увидот на таа локација беше одложен минатата година од безбедносни причини.
Махџуб рече дека станува збор за складиште лоцирано на патот кон границата со Чад што МААЕ го посети во 2020 година и го запечати со црвен восок. Бурињата се пронајдени на околу пет километри од магацинот, рече тој.
Тој претпоставува дека група од Чад го нападнала магацинот и ги зела бурињата со надеж дека во нив има оружје или муниција, но потоа ги оставила зад себе. МААЕ не ја коментираше информацијата.
Либиската национална армија, под команда на Калифа Хафтар, се бореше со силите од западниот дел на земјата од 2014 до 2020 година и го нападна Триполи во 2019 година за да избегне преземање на власта. Конфликтот заврши со прекин на огнот, но политичкиот процес насочен кон обединување на Либија е во ќорсокак, а источните фракции го отфрлаат легитимитетот на меѓународно признатата влада во Триполи.