Скопје денеска повторно е меѓу десетте најзагадени градови во светот и втор најзагаден во Европа по Сараево. Главниот град има индекс од 177 и се наоѓа на деветтата позиција листата што ја објавува „IQAir“, а пред него има неколку градови од Индија, Кина, Бангладеш. Најзагадено е во Центар и Лисиче.
Во текот на денот се крена маглата под која се разбуди Скопје, но позицијата на листата на најзагадени градови не се подобри. Количеството на ПМ2,5 честичките во Скопје е 19,8 пати повеќе од вредноста што ја објавува Светската здравствена организација.
Министерството за животна средина информираше дека во Битола и Струмица престануваат да важат препораките и мерките за надминат праг на алармирање за загаденоста на воздухот.
– Согласно податоците од Државниот мониторинг систем за квалитет на амбиенталниот воздух на ден 5.01.2023 година, среднодневните концентрации на ПМ10 суспендираните честички се под дефинираниот праг на алармирање од 150 мg/m3, и епизодата од два последователни дена е прекината во Битола и Струмица и престануваат да важат препораките и мерките за надминат праг на алармирање се наведува во соопштението од МЖСПП.