Русија повторно истрела ракети врз неколку делови на Украина, а утрово ширум земјата се огласија сирени за воздушен напад. Украинските власти и медиумите објавија дека има експлозии во северозападниот град Ривне, во пошироката област Киев и во Одеса.
Системот за противвоздушна одбрана бил активен, соопштија властите на главниот град. Официјални лица споделија видеа на социјалните мрежи на кои наводно се гледа како украински борбен авион соборува руски проектил. Украина пресретна пет проектили насочени кон Киев, изјави советникот на украинскиот претседател Олексеј Арестович.
Градоначалникот на Киев Виталиј Кличко ги потврди нападите на главниот град. „Се огласуваат сирените за воздушен напад“, напиша Кличко на својот канал Телеграм и ги советуваше граѓаните да останат во засолништата за воздушни напади.
Руската војска ги интензивираше нападите врз украинската цивилна инфраструктура, вклучително и електрани, а украинскиот претседател Володимир Зеленски рече дека околу 40 отсто од енергетската инфраструктура е веќе уништена.
Украинските власти во саботата повторно пријавија проблеми со снабдувањето со енергија и вода во земјата. Проруските воени блогери објавија дека девет бомбардери Туполев Ту-160 учествувале во најновите напади на украинска територија.
Тие објавија и видеа на кои наводно се гледаат руски ракетни напади врз Украина. Снимката не можеше да се потврди независно. Извори блиски до Кремљ тврдат дека биле нападнати вкупно 12 градови и региони, меѓу кои и регионот Дњепропетровск и градот Лавов.