Седумчлена комисија од Општина Центар добила задача да направи увид и записник за штетите предизвикани од невремето од пред две недели во Скопје. Најголеми штети дождот и градот предизвикаа во Центар. Граѓаните пријавуваа дека летаат покриви, дрвја паѓаат врз возила и прават штети, а водата од улиците ги поплавува приземните делови на објектите.
„Веќе е формирана комисија од страна на градоначалникот која е во состав од четворица советници од Советот на Општината и тројца вработени во општинската администрација. Комисијата е потребно да направи административна селекција на пристигнатите барања, увид на штетата и записник за затекнатата состојба, после гореспоменатите планирани активности а согласно позитивните законски норми, барањата со направени записници и констатирани штети, ќе бидат доставени за понатамошни одлуки од страна на Советот на Општина Центар“, велат од Општина Центар.
Општинарите добиле педесетина барања за надомест на штети.
„До Општина Центар преку телефонскиот број за итни случаи (112) се пристигнати околу 30-тина барања за пријави и проценки на штети и 15-тина барања преку архивата на општината. Дел од барањата се исти, пријавени преку телефонски број 112 и доставени преку архивата. Голем процент од барањата се за исти станбени згради, пријави доставени од повеќе соседи за проблеми со оштетување на покривна конструкција, поплавени индивидуални семејни куќи, паднати ѕидови, дел се за оштетени возила од дрва, поплавени гаражи и подрумски простории“, велат од Центар.
Невремето од 30 август поплави делови од Скопје, го закочи сообраќајот, а на листата од поплавени објекти се најде и најновиот трговски центар „Ист гејт“.