Економијата на Обединетото Кралство забележа најголем економски пад во последните 300 години. Британскиот БДП падна за 11 отсто во 2020 година, што е најголем економски пад од 1709 година, објави британската канцеларија за статистика.
Падот на британската економија е последица на пандемијата на коронавирус, но тој е многу поголем отколку во другите западни економии, покажуваат најновите ажурирани статистички податоци.
Според историските податоци запишани од Банката на Англија, ова е најголемиот економски пад на Островот во последните три века.
Британското биро за статистика мораше да ги ревидира претходните проценки за падот на економијата во 2020 година. Нивните проценки беа дека БДП ќе опадне за 9,3 отсто, што ќе биде најлош резултат од Првата светска војна.
Новата проценка на статистичарите покажува дека во 2020 година Велика Британија претрпе најголем пад на БДП од Големиот мраз во 1709 година.
И пред оваа корекција, британскиот економски пад беше најголем во 2020 година во рамките на групата развиени земји Г7, а најновата ревизија го прави поголем пад од Шпанија, која забележа пад на БДП од 10,8 проценти.
Во меѓувреме, британската економија успеа силно да закрепне во 2021 година.
Но, брзиот раст на инфлацијата и постоењето на построга монетарна политика се закануваат дека британската економија повторно ќе влезе во рецесија на крајот на оваа година.