Жителите на Аеродром и на Ново Лисиче се жалат дека чад и миризба од изгорена пластика секоја вечер се шири во овие населби, пренесе Канал 5.
– Облак од чад кој шири миризба на запалена гума и пластика од доцна навечер до раните утрински часови. Речиси идентична приказна раскажуваат жителите на скопските населби Ново Лисиче и Аеродром. Дел од нив на интернет ги објавија овие слики на кои се гледа изгрејсонцето над општина Аеродром заматено во чад. Се сомневаат дека некој илегално пали ѓубре и отпад во одамна затворената депонија Вардариште и иако ова се случува со години до сега никој не презел ништо сериозно за да ги спречи мистериозните потпалувачи.
Граѓаните се жалат дека и ова лето како претходните среде августовските жештини мораат да затвораат прозорци затоа што се плашат за здравјето на нивните деца и внуци.