Ниту една лага од Белиот дворец не може да го сокрие фактот дека ВМРО-ДПМНЕ и структури на Алијанса за Албанците од Скопје блиска до Арбен Таравари создаваа крвави сценарија за меѓуетнички инциденти, реагираат од СДСМ на соопштението од ВМРО-ДПМНЕ.
„Сите пиштолџии, лица кои вперуваа и пукаа со пиштоли во Скопје се пронајдени и се санкционирани и сите до еден се или членови или блиски луѓе до структури на Алијанса. Наместо да прави конструкции, ВМРО-ДПМНЕ да излезе и да каже дали неуспешниот пироман и армиски дезертер Драган Ковачки е лицето за контакт од ВМРО-ДПМНЕ за ова неуспешно сценарио? Зошто молчи Ковачки на прашањето дали ги координирал лицата со качулки пред Собранието и поранешни припадници на Армијата во насилното сценарио? Дали Арбер Таравари е лицето за контакт со структурите блиски до Алијанса во Скопје?“, прашуваат од СДСМ.
Според нив, како што расте нервозата од неуспешното крваво сценарио на Мицкоски, Ковачки и Таравари, така, како што велат се зголемува и продукцијата на лажни вести, манипулации и конструкции од белиот дворец.
„Нервозни се затоа што и покрај сите нивни обиди за дестабилизација и покрај сите провокации и закани, граѓаните им го свртеа грбот и решија државата да продолжи по европскиот пат“, посочуваат во напишаното од страна на СДСМ.
