Почна 77-та пленарна седница во Собранието, на која единствена точка на дневниот ред е интерпелацијата за работата на претседателот на парламентот, Талат Џафери.
Интерпелацијата за собранискиот спикер ја поднесе ВМРО-ДПМНЕ на 30 мај, а Џафери го запази рокот во Деловникот и закажа седница.
„Многупати бев обвинуван дека интерпелациите ги држам во фиока. Затоа денес е таа на дневен ред. Поради фактот што има многу пратеници за збор, процесот ќе трае до исцрпувањето на листата на пријавени за збор, но мора да се одлучи по интерпелацијата најдоцна до полноќ. Со седницата ќе заседава потпретседателот на Собранието. Денес ми го дадоа писмото во кое се образложува интерпелацијата, а барањето е готово пред еден месец. Не знам зошто првиот потписник Антонио Милошоски се јавил последен за збор“, рече Џафери во воведното обраќање.
Во согласност со член 49 став 1 од Деловникот, претресот по интерпелацијата трае еден работен ден, до исцрпувањето на листата на пријавените пратеници за збор, а се одлучува најдоцна до полоноќ. Претседателот на Собранието, Џафери, на седницата има право да го образложи својот писмен одговор или да даде устен одговор на поставената интерпелација.