Министерот за надворешни работи Бујар Османи тврди дека МНР нема формално досега не го добил францускиот предлог кој е најавен како можно решение за спорот со Бугарија.
Претседателот на собраниската комисија за надворешна политика, Антонио Милошоски преку писмо побара од Османи да ги достави до парламентот протоколот и преговарачката рамка за пратениците да расправаат по нив, но министерот демантираше дека добил официјален предлог од Париз.
Прво – формално досега не е добиен Француски предлог како можно решение за блокадата од страна на Бугарија, затоа што прво се добиваат мислењата на земјите – членки на ЕУ, со кои ние сме во постојана комуникација; оттука нема можност било каков предлог да се достави до Собранието и/или неговите тела.
Второ – евентуален Протокол, кој се спомнува како веќе готов документ, можеби ќе преставува записник од одржување на Меѓувладина комисија меѓу Северна Македонија и Бугарија, која е предвидена со Договорот за пријателство од 2017 година. Засега е одржана само една седница на оваа Комисија во 2019 година, и овој записник, кој е единствениот Протокол засега, е јавно достапен веќе три години. Оттука нема финализиран записник затоа што не е одржана втората седница на Меѓувладината комисија“, истакна Бујар Османи.
Министерот е согласен да се утврди термин за настап пред Комисијата за надворешна политика, иако таму не секогаш се чувствувач добредојдено и пријатно, но притоа Антонио Милошоски како претседател да закаже седница за избор на неколку клучни амбасадори.