Татко и син, кои 40 години биле прогласени за исчезнати, пронајдени се во џунгла во централниот дел на Виетнам, каде се криеле од крајот на војната со САД.
Хо Ван Тан, кој денес има 82 години, последен пат е виден во 1973 година, како трча со тогаш едногодишниот син Хо Ван Ланг, по експлозијата на бомба во нивната куќа во која настрадале неговата сопруга и двете деца.
Тие 40 години поминале во џунглата, без никаков контакт со надворешниот свет, а ги пронашле жители на блиското село, кои ги алармирале властите.
Комуникацијата со двајцата мажи е речиси невозможна, бидејќи старецот зборува исклучиво на дијалект, додека неговиот син знае само неколку зборови.
Според пишувањето на виетнамскиот весник „Дан Три“, успеале да преживеат, благодарение на зеленчукот и ловот.