Четири години по ред Република Македонија добива позитивни извештаи од страна на Европската Комисија и препорака за почеток на преговорите со Европската Унија, но СДСМ никогаш не собра храброст да ги поздрави позитивните чекори кои што Република Македонија ги правеше досега, наведува ВМРО-ДПМНЕ во реакцијата на прес-конференцијата на Дамјан Манчевски.
Партијата истакнува дека четири години СДСМ ја критикува сопствената држава за се што треба и не треба, мислејќи дека на тој начин ќе ја смени власта, не сфаќајќи дека со тоа само и нанесува штета на државата.
– За разлика од ваквата пракса, СДСМ никогаш не собрале храброст да коментираат и да признаат кога пристигнуваат пофални зборови од било која европска и меѓународна институција, велат од ВМРО-ДПМНЕ, притоа посочувајќи дека Манчевски денеска одбил да ги коментира реакциите од ОБСЕ за предлог-законите за медиуми и за аудиовизуелни медиумски услуги.