Од 18. до 28. јули Струмица ќе биде европски кошаркарски центар-домаќин на Европското кошаркарско првенство за кошаркари до 18 години.
По тој повод денес топло добредојде на членовите на младинската кошаркарска репрезентација на Македонија им посакаа градоначалникот Зоран Заев и претставниците на четири здруженија на лица со посебни потреби.
-Денеска со овие здруженија ние им посакавме топло добредојде и пријатен престој во Струмица и многу успех на нашите млади репрезентативци.
– Со тоа би сакале да упатиме силна порака до струмичани и тоа не само до љубителите на спортот, туку до сите, да дојдат во спортските сали, да ги бодрат нашите репрезентативци и да навиваат, како што тоа ние знаеме да го направиме и да ги наполнат салите, рече градоначалникот Заев.
Селекторот на младинската кошаркарска репрезентација Мирсад Куртовиќ му се заблагодари на градоначалникот Заев за гостопримиството и поддршката и ги повика струмичани да бидат нивниот шести играч.
Во знак на благодарност, тој на Заев му врачи кошаркарска топка.
И претставниците на здруженијата добија топки со автограми од членовите на младинската кошаркарска репрезентација на Македонија.
