Христијанско момче е осудено во Пакистан на доживотен затвор поради испраќање на „богохулни СМС пораки“.
Осудениот Саџад Масих треба да плати и 200.000 пакистански рупии (2.000 долари). Пресудата е изречена од судот во источната провинција Пенџаб во саботата, но е објавена денеска.
Пресудата е обжалена од Обвинителството, кое бара смртна казна, како и од одбараната на Масих, која се надева на нов судски процес.
Масих беше уапсен во 2011 година за испраќање на СМС пораки до муслимански свештеници. Пораките содржеле коментари и навреди за пророкот Мухамед.
Тоа е прв случај на судски процес во Пакистан по обвинение за богохулење преку мобилен телефон или интернет.
Законот против богохулење е усвоен во 80-тите години на 20 век, кога на власт беше генерал Зија ул Хак. Законот е критикуван од организациите за заштта на човековите права, кои тврдат дека претставува инструмент насочен против религиозните малцинства.