Лидерот на курдските бунтовници Абдула Оџалан, кој отслужува доживотна казна затвор на островот Имрали во Мраморното Море, може да биде пуштен од затвор поради здравствената состојба, изјави претседателот на Ирак Џалал Талабани за порталот на Патриотскиот сојуз на Курдистан, пренесува ИТАР-ТАСС.
Ослободувањето на лидерот на Курдската работничка партија (ПКК) може да биде реалност, доколку се земе предвид фактот што изминатиот период некои затвореници во Турција се ослободени или добиле олеснувања на казните поради здравствени проблеми.
Претставник на Сојузот на курдски општини изјави дека ослободувањето на Оџалан е исклучително важно за успехот на мирното решавање на курдското прашање во Турција.
Според весникот „Милиет“, сојузот на лекари во Турција побарал од властите да дозволи посета на островот Имрали за медицински преглед на Оџалан.
Претходно ПКК изрази незадоволство од политиката на Анкара за решавање на курдското прашање.