Жител на населбата Кисела Вода на Фејсбук објави фотографии на кои се гледа како старо, исушено дрво, кое попладнево го собори силниот ветер и невремето што го зафати Скопје, паднало врз гаражи и оштетило автомобил на улицата „Вера Јоциќ“.
Граѓанинот кој ги сподели фотографиите, а во чија сопственост е една од двете оштетени гаражи, вели дека сличен инцидент имало и пред неколку години, кога, по некоја случајност, бил оштетен истиот автомобил што настрада и денеска. Тој додава дека заедно со соседите многупати залудно се јавувале кај надлежните и барале да бидат исечени старите и опасни дрвја на нивната улица.
Жителите на улицата велат дека има уште неколку вакви исушени дрвја, кои и натаму претставуваат опасност и бараат општинските или градските служби конечно да дојдат и да ги исечат.
„Што треба да се случи за да се исечат дрвата? Дали ќе може да испратите екипа со кран да интервенира и да исече пред да оштетат некого по трет пат?“, прашува оштетениот граѓанин.