Пораки разменети меѓу обвинетиот Миле Јанакиевски и поранешната министерка за култура Елизабета Канческа-Милевска, два месеци пред крвавиот упад во Собранието, денес беа презентирани во судот. Тие меѓусебно зборувале за протестите кои се одвивале во февруари 2017 година и учество на познати уметници на нив. Меѓу пораките има и таква во која Канчевска-Милевска му вели на Јанакиески: „Пред Собрание ќе биде топ“.
Русковска пред судот кажа дека првата порака е од 21 февруари 2017 година, кога Канческа-Милевска го прашува Јанакиески: „Миле, има нешто ново“, при што тој одговара, со: „не“. Со овие пораки, обвинителката Русковска сака да докаже дека Јанакиески е еден од организаторите на протестите кои завршија со крвавите инциденти.
На 27.02.2017 година, Канческа-Милевска му пишува на Јанакиески: „Миле многу слабо озвучување, еден мегафон, ништо не се слуша“.
На први март 2017, односно скоро два месеци пред упадот во Собрание, Канческа-Милевска барала свирчиња и труби од Јанакиески, за како што вели, другарите на син ѝ Јаков.
„Свирчиња ми требаат“ пишува Канческа-Милевска и дополнува со: „и труби“, па во следна порака: „Многу ми требаат“. На ова Јанакиески одговара: „Нели има“, а Канческа-Милевска прашува: „Кај има“, по што добива одговор од Јанакиески: „Кај Нело“. На Канческа-Милевска ова одговара со: На Јаков му требаат за другарите“.
Во комуникацијата меѓу Канческа-Милевска и Јанакиески се зборува и за актери, пејачи и јавни личности, за кои сметаат дека би било добро да се обратат на тогашните протести. Според пораките презентирани од обвинителката Русковска, се зборувало и за Владо Јовановски да се обрати на еден од настаните.
На рочиштето беа презентирани и докази со кои Русковска докажуваше дека Јанакиески и Канческа-Милевска се среќавале во седиштето на ВМРО-ДПМНЕ.