Дефект на броило во разводната табла ноќеска предизвика пожар во станбена зграда во населбата Бејбунар во Охрид.
Веднаш интервенираа неколку екипи на Територијалната противпожарна единица, а од безбедносни причини евакуирани беа станарите од станбениот комплекс.
Пожарот е локализиран и нема повредени, освен предизвиканата материјална штета од помал обем.
За половина час, колку приближно траеше интервенцијата на противпожарната служба, целосно беше запрен сообраќајот во една насока на булеварот „Туристичка“ во Охрид.
