Европската комисија соопшти дека земјите членки на Механизмот за цивилна заштита се координираат за да и помогнат на Индија каде ситуацијата со Ковид-19 нагло се влоши и недостигна кислород во болниците, јави дописничката на МИА од Брисел.
Портпаролите на Европската комисија потврдија дека Механизмот за цивилна заштита се координира да и помогне на Индија. Овој механизам има за цел да им помага на земјите низ светот во случаи на природни катастрофи и други вонредни состојби.
Во овој механизам членуваат земјите членки на ЕУ како и трети земји вон ЕУ, меѓу нив е и Северна Македонија.
Засега е познато дека Ирска понудила веќе значајна количина кислород за Индија, и дека Франција и Германија изразиле интерес да помогнат исто така.
Европската Комисија е во контакт со земјите членки на Механизмот за да се координира помошта и се очекува во наредните часови или денови да се објави точно како и кога ќе им се помогне на индиските власти во справувањето со новите мутации на Ковид-19.